KALIBO, Aklan–Ginakasubo it retired police ro mga panakawan nga naga-eontad makaron sa mga kabanwahanan sa bilog nga probinsya it Aklan.
Suno kay Col. Nemesio Neron, Aklan first district board member nga kakueangan sa pagpangabuhi ro nagatueod sa mga raya agud nga magpanakaw.
Apang, eubus nga makasueobo suno kana nga ro nagahimo eamang kara hay ro mga tawong matamad.
Kon maghugod kunta ro kada isaea hay inde makapaino-ino nga magpanakaw agud nga masustentuhan ro kinahang-eanon it andang pamilya.
Obligasyon suno kay Col. Neron nga imbestigahan it pulisya ro insidente it mga panakawan agud nga matumod ro mga suspek apang bukon eamang it raya ro trabaho nga nakaatang sa abaga it mga awtoridad.
Rason nga mabahoe gihapon nga bulig ro kooperasyon it publiko agud nga mataw-an it lead ro mga kapulisan agud matapna ro illegal nga aktibidad it mga manakaw.
Apela nana sa pumueoyo nga maging alerto sa tanan nga oras kapin eon sa makaron nga panyempo nga maabong kubos nga indibidwal ro nagakalisod sa andang pagpangabuhi ag ro unnag punterya agud nga makahaw-as sa andang ginapangatubang nga problema hay ro pagpanakaw.
Madumduman nga sangka job order sa banwa it Buruanga ro nagpanakaw it mabahoe nga kantidad sa Municipal Treasurer’s Office it LGU bangud sa problema sa kwarta.
