KALIBO, Aklan—Nagpahayag it kahauman si new washington mayor Shimonette Peralta-Francisco nga atubangon ro anumang kasong igapasaka kontra kana ni Mr. Ronald Gumboc.
Reaksyon raya ni mayor Francisco matapos nga magapasaka sigon it kasong obstruction of justice si Gumboc sa Inter-Agency Task Force on Emerging Infectious Diseases angot sa kontrobersiyal nga fake news sa nasambit nga banwa.
Gintumod pa it alkalde nga ro reklamo hay owa it basehan.
Bilang chairman suno kana it gintukod nga municipal inter-agency task force on covid-19, kaibahan sa anang obligasyon nga bantayan ro mga nagatuhaw nga fake news agud nga malikawan ro pag panic it anang mga pumueuyu.
Suno kana nga gin-repost eamang nana ro naka-abot kana nga mensahe ag ginbutangan it caption nga fake news.
Gin-forward man sigon nana raya sa andang bise alkalde ag sangguniang bayan bangud nga involved sigon sa isyu ro sambilog sa andang mga miyembro.
Samtang, ginatugyan nana sa konseho ro pagresolba sa isyu bilang pagrespeto sa gahum it executive ag legislative, apang kon may magahinyu nga patung-an eon nana ro problema hay haum man raya nga magsunod.
Sa pihak nga parte, ginpaabot ni mayor Francisco kay SB member Rolly Equiña nga maeayo pa ro eleksyon ag dapat anay nga tutukan ro presenteng problema sa covid 19 pandemic maskin nga nagapabilin nga negatibo sa sakit ro nasambit nga banwa.
