NATIONAL News — Naga-istorya eon makaron ro gobyerno it Pilipinas ag New Zealand para sa posibleng pagsueod it durian exports sa merkado it New Zealand.
Raya ro gin-anunsyo ni Pangueong Marcos sa andang ginpatigayon nga bilateral meeting kaibahan si New Zealand Prime Minister Christopher Luxon sa sidelines it 44th ag 45th Association of Southeast Asian Nations (ASEAN) Summit and Related Meetings sa Laos, ko nagtaliwan nga Biyernes.
Samtang, ginpahayag man ni Prime Minister Christopher Luxon ro naga-umwad nga kasugtanan sa tunga it daywang nasyon sa patag it kalakalan ag ekonomiya.
Nauna kara, nag-request man ro Wellington para sa market access para sa andang sibuyas sa Pilipinas.
Ginpahayag it Malakanyang nga padayun ro konsultasyon sa tunga it Department of Agriculture ag Ministry for Primary Industries of New Zealand, ag ro pag-istorya hay “expected to be completed soon.”
Mag-eowas sa kalakalan, gintumod ni Luxon ro positibong development sa engagement it Wellington sa Manila pag-abot man sa edukasyon, seguridad ag patag it politikal.
Sa makaron hay nagabueuligan man ro Pilipinas ag New Zealand para ipataas ro andang diplomatic ties ag gin-finalize ro Proposed Roadmap to Comprehensive Partnership 2024-2025.
Sa pihak nga parte, ginpahayag ni Pangueong Marcos nga nagahimo ro daywang nasyon it “some good progress” sa text it roadmap.
Ginpahayag raya ni Pangueong Marcos kat kutan-on si Luxon kun ano ro mga dapat nga istoryahan agud nga maduso ro mga plano.
