KALIBO, Aklan — Ginkumpirma it National Food Authority ukon NFA-Aklan nga nagapamakae sanda it malimyo ag uga nga paeay nga may 14 percent moisture content sa balor nga P19 kada kilo ag ro wet palay ukon eabtong nga may 30 percent moisture content sa P14 kada kilo halin sa farmer cooperatives.
Suno kay NFA provincial manager Josephine Castillo nga ro mga lehitimo eamang nga mangunguma ro pwedeng makabaligya kanda.
Ro mga individual farmers hay pwede sigon nga makabaligya it maximum nga 200 bags.
Tuyo sigon kara nga mapanaba ro retail price it bugas ag mapabilin ro andang local palay-buying operations.
Sa pihak nga parte, ro baeak-ean sigon makaron it paeay hay nagahampang sa P16 hasta P18 sa clean and dry ag P14 sa eabtong kada kilo, apang ginaeauman nga maganaba pa sa tiempo it anihan.
Samtang, gindugang pa ni Castillo nga bastante ro stock it andang imported rice kamana man ro local nga paeay nga kon sa siin hay haum man para sa pagpa-galing.
Ro presyo it NFA rice hay nagapabilin sa P27 kada kilo.
Hasta sa Oktubre 10 eon lang sigon ro andang palugit sa pag-stock it mga imported rice ag igabueos ro local rice .
