NATIONAL News — Ginmultahan it Energy Regulatory Commission (ERC) it P3.5 million ro National Grid Corporation of the Philippines (NGCP) bangud sa kapas-eawan nga maabot ro schedule sa pagpatuman it 10 nga transmission projects.
Sa sangka statement, ginpaathag it ERC nga sa desisyon nga may petsang Hunyo 25, 2024 ag gin-promulgate ko Agosto 31, 2024, ro NGCP ro ginmultahan bangud sa indi mapaathag nga delay sa pagpatuman it 10 nga CAPEX (capital expenditure) projects.
Suno sa power industry regulator, kaeaakip sa mga proyekto nga naatrasar hay ro Cebu-Negros-Panay (CNP) 230kV Backbone Project Stage 3 nga ginaturo nga magiging solusyon sa maeapnagon nga brownout sa bilog nga Western Visayas.
Sa nasambit nga desisyon, ginpamilit it ERC nga obligasyon it NGCP nga magsunod sa project timelines nga gin-aprubahan kat nag-apply sanda para sa CAPEX projects.
Ginpahayag pa it regulator nga ro delays sa pagpatuman it anuman nga CAPEX projects hay grabeng naka-apekto sa reliability it grid ag sa ikasarang it transmission system nga mag-absorb it bag-o nga power capacities nga naga-apekto man sa public interest.
Dugang pa it ERC, ro anuman nga motion for reconsideration sa desisyon hay indi makapugong sa desisyon nga mangin executory mag-eowas eamang kun imandu eon it komisyon.
