KALIBO,Aklan—Makaangkon it temporaryong closure sa pagpatubi sa eastern side ro National Irrigation Administration ukon NIA Aklan umpisa Agosto 17 hasta it 31, 2020.
Suno kay NIA Aklan head Engr. Lorena Sioco, raya hay agud nga taw-an it daean ro construction nga pagahimuon sa main cannal sa Brgy. Bacan, Banga ag ro lateral C sa Brgy. Estancia, Kalibo.
Ro nasambit nga tikang suno kana hay ginkasugtanan it mga nagkaeain-eain nga Irrigator’s Association president sa ginpatigayon nga pueong ko nagtaliwan nga dominggo.
Ginpaathag nga inde sigon makaapekto sa tanom nga paeay ro daywang dominggo nga kawad-an it tubi sa mga irrigation cannal nga ro eubus nga maapektuhan hay ro mga kaeanasan sa banwa it New Washington, Kalibo ag Banga bangud pag-uean uean nga naeeksperyensyahan kada adlaw.
Ginpaathag dugang ni Engr. Sioco nga ginakonsidera man sigon it IA president ro nasambit nga petsa bilang maintenance phase halin kat nag-umpisa ro pagpatubi sa mga kaeanasan ko buean it Hunyo.
Sa makaron sigon maskin may pandemya hay nagapadayon ro construction sa daywang ka dam ag ginahueat pa nanda ro steel gate nga igabutang sa mga raya nga ginhimo pa sa Cebu kon sa siin nadelay ro delivery bangud sa epekto it pandemya.
