KALIBO, Aklan—Igapatuman makaron sa isla it Boracay ro “No registration, no swimming” policy base sa ginpaguwa nga Executive Order No. 027 it lokal nga gobyerno it Malay.
Suno kay Malay Mayor Frolibar Bautista nga kinahang-ean magpalista anay sa lifeguard station ro sin-u mang gustong magpaligos sa baybayon.
Raya hay bangud kinhang-ean nga malimitahan sa 100 katawo ro pasugtang magpaligos sa mga designated area halin alas-6:00 it agahon hasta it alas-6:00 it gabi-e agud mapatuman ro social distancing nga may daywang metro ro antad.
Mag-eowas kara, dapat hay may distansiya man ro mga nagapatigayon it beach viewing ag sun bathing.
Ro mga magapamasyar man sa beachfront ag iba pang bahin it isla hay kinahang-ean nga nakasuksok it facemask ag mag-obserba it physical distancing.
SSAntes magpaligos, pagaboe-an anay it body temperature.
Bawae man ro nakasanayang pag-renta it goggles ag snorkeling masks butang nga kinahang-ean magdaea it kinahang-eanon nga mga gamit.
Makaron nga adlaw hay buhos ro mga nagasueod sa isla nga kaeabanan hay mga nagabalik nga mga trabahador.
Suno kay Mayor Bautista, iga-assess nanda ro sitwasyon makaron nga adlaw sa uman nga pagbukas it isla para sa domestic tourists.
Ro tanan nga mga accommodation establishments hay kinahang-ean nga may Certificate of Authority to Operate halin sa Department of Tourism (DOT) ag Mayor’s Permit antes pasugtan nga maka- operate ag dapat nga may pre-booking man ro mga turista.
