Ginpahayag ni Senate President Vicente ‘Tito” Sotto nga dapat ikonsidera ni Sen. Ronald “Bato” Dela Rosa ro “no work, no pay” scheme ukon indi pagbaton it anang sweldo hasta sa oras nga makabalik imaw ag haum eon nga magpakita sa senado.
Ginpaathag ni Sotto, mabuhay eon nga tiempo nga ulihing nakatambong sa mga sesyon ag nakasueod sa anang mga komite ro senador tuga it posibilidad nga pagpaguwa it International Criminal Court (ICC) it warrant of arrest kontra kana.
Suno kay Sotto, kunta nga ikonsidera ni Dela Rosa ro anang suhestiyon para eon man maduea ro gina-alegar nga “pressure” sa opisina kara tuga it sunod-sunod nga pag-absent kara.
Sa pihak kara, maskin nga owa nakikita ro presensiya ni Dela Rosa sa mataas nga kapueungan hay padayun man sigon ro pagtrabaho it anang opisina nga nakakasumite man it mga bills, resolution ag recommendations sa mga ongoing nga mga pagpamati.
Samtang, indi eon sigon mangawa ro senate president sa posibilidad nga may magapasaka it ethics complaint kontra kay dela Rosa bangud sa owa kara pagsipot ag pagsueod sa opisina.
Ginaeauman eon ni Sotto nga may sambilog sa andang kaibahan ro magapasaka it complaint agud nga makapaathag man ro senador para sa anang mga pag absent sa senado.
