KALIBO, Aklan— Nagpabulig sa Bombo Radyo ro pamilya ag karelasyon it sangka Overseas Filipino Worker (OFW) bangud sa bukon sigon it maayos nga pagtrato it employer sa andang kapamilya nga presenteng nagatrabaho sa nasyong Riyadh, Saudi Arabia .
Sa interview it Bombo Radyo Kalibo, ginpahayga ni Walter Casanova, tubong Mindanao, sangka OFW man sa Saudi Arabia ag karelasyon it domestic helper nga si Aileen Zomil ag residente it Barangay Rosal, Libacao , Aklan nga ginkulong sigon it anang amo sa kuwarto ro anang nobya, uwa ginapakaon.
Ko Agosto 11, 2018 eamang sigon nagpadueong si Aileen sa Saudi Arabia apang nagreklamo eon raya bangud sa ginapasa-pasahan imaw ko pamilya it anang amo.
Mag-eowas kara, nakaeksperyensya man sigon imaw it pang-abuso sa ama it anang employer matapos nga nag-masturbate raya sa anang atubadngan.
Nagkasakit eon sigon si Aileen bangud sa mabug-at nga trabaho halin alas-6:00 it agahon hasta alas-12:00 it tungang gabi-e.
Samtang, ginpasiguro ni Jack Arroyo, Overseas Workers Welfare Administration (OWWA) Region 6 welfare case officer 3 nga pagabuligan nanda ro nasambitang OFW sa ginapangatubang kara nga problema.
