Gindeploy eon ni North Korean leader Kim Jong Un ro andang militar may kaangtaan para magbulig nga maayos ro distribusyon it mga COVID-19 medicines.
Ro nasambit nga tikang it andang gobyerno hay matapos mapaidaeom sa lockdown ro adang nasyon bangud sa nakumpirma nga coronavirus outbreak.
Kung madumduman nga inamin man ni North Korea leader ku nagtaliwan nga dominggo nga sa unang kahigayunan hay nagapangatubang sanda sa sangka “explosive” COVID-19 outbreak.
Bangud kara ginakabaeak-an man it pilang ka mga eksperto nga posibleng magdaea raya it grabeng krisis sa kumunistang nasyon bangud sa limitado eamang ro mga medical supplies ag owa man sigon it mga vaccine program sa nasambit nga nasyon.
Kasunod man kara ro pagmandu ni Kim sa andang katapu it army nga insigida nga buligang ma-stabilise ro supply it mga bueong kapin capital nga Pyongyang kung siin una nga lugar nga may na-detect nga Omicron variant.
Sandig sa report nga maghalin sa North Korea, ro tinamaan eon it virus hay kapin sa 1,213,550 kung siin 50 eo kara ro mga namatay.
Sa pihak nga parte nagpromisa man ro South Korea partikular si President Yoon Sul-yeol nga haum ro andang gobyerno nga magresponde it bulig sa North Korea kapaeariho it pagsuplay it mga bakuna ag medisina kung pagapasugtan it Pyongyang.
