Kalibo Aklan —–Owa naging patas ro National Telecommunications Commission (NTC) bangud sa pagtalikod sa andang commitment nga maga-isyu it provisional authority sa ABS-CBN.
Suno kay Sangguniang Panlalawigan Member Atty. Harry Sucgang nga dapat nga bukon it ora-orada ro pagpatuman it Cease and Desist order sa baylo hay gintaw-an it palugit nga napueong adlaw agud nga makapaathag.
Makalibot suno kana ag matsa ginpataeang ro nasambit nga media corporation it NTC .
Ginpahayag dugang nga improper ro pagpasarado sa atubang it ginapangatubang nga coronavirus pandemic , kun sa siin, eubus nga kinahangean it publiko ro impormasyon angot sa mga nagakatabu sa nasyon ag maskin sa bilog nga kalibutan.
Mag-eowas kara, ro telebisyon suno kana ro ginakalibangan makaron it mga tawo nga nagatuman it “stay-at-home” policy .
Sa pihak nga parte, nagapati si Atty Sucgang nga ro manaba nga kapueongan it kongreso ro dapat nga basueon sa natabu sa ABS-CBN bangud sa andang pagpabaya ag owa pagtau it prayoridad sa franchise renewal kara .
Ro broadcast franchises hay nakasandig sigon sa gahum it Kongreso.
Nakadepende sigon kanda kon pagapasugtan raya nga mag-operate matapos ro CDO it NTC .
Samtang, pwede suno kana nga makadangop ro network sa korte suprema sa pagpaguwa it Temporary Restraining Order (TRO).
Sa pihak nga parte, nagasunod eamang sigon ro NTC sa laye nga nagahambae nga kon owa it prangkisa hay indi pwedeng maka-operate ro sangka network.
Nasayuran nga ko Martes hay nagpaguwa eon it desisyon ro NTC agud nga baeabagan sa pag-ere ro network matapos mapaso ro andang prangkisa ko Mayo 4.
Gintaw-an ro kompaniya it 10 adlaw agud nga makasabat sa NTC.
Base pa sa pahayag it NTC, bangud sa pag-expire it RA No. 7966, ro laye nga nagatau it 25 year franchise sa ABS-CBN hay bukon eon it balido agud nga mag-ere bangud sa pag-eabag sa Radio Control Law.
Madumduman nga ginbanatan ni Solicitor General Jose Calida ro NTC nga indi pagtaw-an it provisional authority to operate ro ABS-CBN, kundi hay pwedeng pasakaan it kasong graft ro mga opisyal it NTC.
