KALIBO, Aklan—Ginaeauman nga madugangan pa ro numero it mga pamilyang benepisyaryo it Pantawid Pamilyang Pilipino Program ukon 4Ps sa Western Visayas nga makakas halin sa nasambit nga programa.
Raya ro ginpahayag ni Atty. May Rago-Castillo, DSWD-6 regional information officer.
Suno kana nga ko nagtaliwan nga buean it Hunyo hay nag-abot eon sa 12,949 ro nabo-oe sa andang listahan.
Base sa andang record, kapin sa 11,500 nga pamilya ro bukon eon it kwalipikado bangud nga owa eon sanda it eligible nga school-aged children para sa monitoring samtang ro 1,500 nga iba pa hay nakaangkon eon it maayos nga pagpangabuhi rason nga kinahangean eon nga mag-graduate sa programa.
Dere-deretso makaron ro gina-obra nga intensified cleansing it DSWD sa listahan it 4Ps beneficiaries kasunod it mandu ni secretary Erwin Tulfo.
Gindugang pa ni Atty. Castillo nga pila sa mga beneficiaries hay natumod nga owa nagasunod sa mga kundisyon it 4Ps rason nga ginabo-oe sa listahan.
May mga tawuhan sigon sanda nga nagapatigayon it assessment gamit ro Social Welfare Development Indicator.
Sa oras nga mabo-oe eon sa listahan hay gina abisuhan ro mga raya ag gina-explain ro mga rason kanda.
Samtang, nakadepende suno kana sa availability it pondo para sa dugang nga slot.
Ro mga benepisyaryo it 4Ps hay makabaton it conditional cash grants sa makabig nga poorest of the poor agud nga mabuligan nga mapaayos ro andang ikamayad nga eawas, nutrisyon ag edukasyon it mga inunga nga naga-edad 0 hasta 18 anyos.
Sa bilog nga Western Visayas, may una nga 336,624 nga households nga sakop it 4Ps.
Sa nasambit nga numero, 27,853 ro naghalin sa Aklan.
