Lalo pang tumaas ro numero it mga namatay nga indibidwal sa pagdaeasa it bagyong Yagi sa pilang ka mga nasyon sa Southeast Asia. Base sa datos nga ginpaguwa it ASEAN Coordinating Center for Humanitarian Assistance, masubra sa 500 katawo eon ro namatay bangod sa mga mabaskog nga pag-uean, pagbaha ag pagguho it eogta ag mga building kasunod it pagdaeasa it mabaskog nga bagyo.
Sa nasyong Vietnam, nailista ro pinakamaabo nga numero it mga namatay nga umabot eon sa haeos 300 katawo. Sa Myanmar, 226 katawo ro namatay samtang nagapabilin nga missing ro kabilugan nga 77 katawo. Sa Thailand, umabot sa 42 katawo ro kumpirmadong namatay, 21 sa Pilipinas, ag ap-at sa Laos.
Suno pa sa ahensiya, milyon-milyong katawo ro nailistang apektado sa pagtaliwan it mismong bagyo kung siin sa Myanmar pa eamang hay umabot eon sa 3.4 katawo ro nagbakwit. Maskin sa nakataliwan nga dominggo pa nagdaeasa ro mismong bagyo, nagdaea raya it mahaba-habang mga pagbaha sa nagkaeain eain nga parti it mga mismong nasyon ag sinundan man it mga monsoon rain.
Hasta sa makaron, ginausoy usoy gihapon ro pilang katawo nga una aon nga nabalita nga missing. Pilang ka mga importanteng istruktura man ro nasamad kaparehas it mga karsada, tulay, power tower, ag mga telecom tower, kaibahan eon man ro libo-libong mga religious building, eskwelahan, ag mga government office.
