KALIBO, Aklan—Amat-amat eon nga nagataas ro numero it mga turistang nagasueod sa world-class beach destination nga Boracay nga pinaka-una nga tourist destinasyon sa nasyon nga nagbukas sa tunga it coronavirus pandemic, kun sa siin, nagabaton pa eamang it mga turista nga halin sa Western Visayas.
Suno kay Edwin Raymundo, presidente it boracay foundation incorporated ukon BFI, grupo it mga negosyante sa isla nga pila sa mga nagdayo nga bisita hay mga resort owner sa kaiping nga mga probinsiya agud nga mag-obserba kon paalin nanda nga ginapatuman ro mga health protocols nga gina-require it Inter-Agency Task Force on Emerging Infectious Diseases.
Nagapabaskog pa sigon ro mga raya it andang health measures ag capacities antes nga magbaton it turista.
Samtang, may mga couple ag mga magpamilya man suno kana nga nagabakasyon sa isla it tatlong adlaw.
Ginaduso it lokal nga probinsiya it aklan ro gradual reopening it Isla sa tuyo nga makabangon ro tourist industry sa tunga it COVID-19 crisis.
Nasayuran nga waeo pa eamang ro nataw-an it certificate of authority to operate it department of tourism region 6 bangud nga maabu pa sa mga hotels ag resorts sa isla ro nagatinguha nga makasunod sa hugut nga health protocols nga sangka requirements antes nga makabukas it negosyo.
Nauna eon nga ginpahayag ni governor florencio miraflores nga posibleng sa hulyo hay mabuksan eon ro flights paagto ag halin sa kalibo international airport ag caticlan airport.
Gindugang pa ni Raymundo nga nalipay man sanda sa nasambit nga development bangud nga mabahoe eon ro andang lugi umpisa sa kasagsagan it pandemic.
Ro mga turista nga nagasueod sa boracay hay obligado nga magsunod sa health protocols.
Raya hay ginaeakipan it mandatory nga pagpa-rehistro antes nga magpaligos.
Apang bawae gihapon ro mga senior citizens ag mga naga-edad it 21 anyos panaba.
Owa man ginapasugtan ro magpicnic ukon magdaea it pagkaon ag ilimnon sa beachfront.
