KALIBO, Aklan — Nagaeaum ro National Youth Commission (NYC) nga pagaharangan it Senado ro ginaproponer nga pagpaiway sa Sangguniang Kabataan (SK) elections nga nakataeana kunta sa Oktubre.
Sa interview it Bombo Radyo Kalibo, nagpanawagan si NYC Commissioner Rhea Buenaflor sa Senado nga inde maghimo it version bill sa postponement it eleksyon.
Sa makaron sigon hay nagdihon sanda it position letter sa Kongreso ag Senado nga ipadayon ro eleksyon bangud tanan nga pagpahaom hay ginhimo eon it Commission on Elections (Comelec).
Mabahoe nga kawad-an sigon raya sa mga pamatan-ong Filipino nga inde mataw-an it kahigayunan nga mabatian ro andang boses.
Suno pa kay Buenaflor nga ro mabahoe nga numero it mga pamatan-on nga nagaparehistro hay nagapakita it andang interest sa nasambitang eleksyon.
Ginpasar sigon ro Republic Act No. 10742 ukon Sangguniang Kabataan (SK) Reform Act agud mataw-an it kahigayunan ro mga pamatan-on nga makibahin sa eleksyon ag maging mayad nga public servants sa paaeabuton nga mga inadlaw.
