Umapela si Bombo International News Correspondent Dennis Nama Rata it Kuwait sa kaparehong overseas Filipino workers nga maging kalmado, mahinahon ag inde mag-intra sa isyu it pulitika kapin eon kon makaapekto raya sa andang trabaho.
Raya hay kasunod it pagklaro it Department of Foreign Affairs (DFA) nga 20 Pilipino ro gin-aresto ag ginkulong sa Qatar matapos mag-rally bilang pagpakita it suporta kay dating Pangueong Rodrigo Duterte sa ana mismong kaadlawan nga presenteng nakakulong sa International Criminal Court (ICC) detention facility ag nagapangatubang sa kasong crimes against humanity nga ginpasaka kontra kana it mga himata it biktima it extra judicial killing kasunod sa anang maeapnagong kampanya kontra sa illegal nga droga sa idaeom it anang administrasyon.
Suno pa kay Rata, bilang mga OFW’s hay dapat isaisip ag unahon gid ro kapakanan it pamilya bangud nga eain ro kultura it Middle East kon ikumpara sa ibang nasyon. Uwa suno kana ginabaeabagan ro sin-o man nga magapakita it suporta sa andang mga ginaidolo nga lider ukon pulitiko it nasyon apang inde kinahang-ean nga umabot sa punto nga makaapekto sa andang trabaho sa andang magiging sitwasyon sa nasyon.
Nauna eon nga ginpahayag it DFA Undersecretary Eduardo de Vega nga napahilway eon ro sambilog samtang 19 nga iba pa ro nagapabilin sa kustodiya it Qatar police station.
Madumduman nga si Rata hay ginkilaea sa tumaeagsahon nga kontribusyon sa Kuwait ag gintaw-an it Presidential Awards for Filipino Individuals and Organizations Overseas sa idaeom it administrasyon ni dating Pangueong Duterte.
