Nagapabilin nga eowas ro mga overseas Filipino workers sa Mahmoud, Qatar sa tunga it nagapadayon nga kinagamo it US, Israel kontra sa Iran.
Suno kay Bombo International News Correspondent Liezel Salvador, uwa it dapat ikabaeaka ro andang pamilya bangud sa mabaskog ro airforce it nasyon ag naiintercept sa airspace ro mga missiles nga nagaeopad sa andang kahawaan.
Sa pihak nga may kahadlok sa nagakatabo, nagapabilin eamang sanda nga kalmado ag padayon nga nagatrabaho sa andang mga amo bangud nga uwa man sanda napabay-an.
May mabatian ag mabatyagan gihapon nga mga pagsabog apang maeayo eon raya sa andang lugar rason nga nagapabilin nga eowas ro mga raya.
Dugang pa ni Salvador, sa pangamuyo sanda nagakapit ag sa suporta man it andang pamilya sa uwa it pahuway nga pagsikyar ag pagpangamusta sa andang kahimtangan.
Nasayuran nga nagapadayon ro pagbaeos it Iran sa ginhimo nga joint combat operation it Estados Unidos ag Israel.
