KALIBO, Aklan — Padayun nga ginatutukan makaron it Philippine Drug Enforcement Agency (PDEA)-Aklan ro baealigyaan it iligal nga droga online ag ro paggamit it mga courier services sa delivery kara.
Raya hay kasunod it pagka-aresto sa 23-anyos nga job order employee it munisipyo it Kalibo, hapon it Huwebes sa Federico Quimpo Avenue, Capitol Site, Brgy. Estancia, Kalibo, kun sa siin narekober sa suspek ro haeos sang kilo it marijuana nga naka-bricks ag nakasueod sa sangka plastic nga bag-o eamang nana nga ginpick-up halin sa sangka courier company.
Suno kay Agent Nicolas Gomez it PDEA-Aklan, raya ro kauna-unahang kahigayunan nga ro suspek nga andang naka-transaksyon hay naggamit it courier services para sa droga nga andang ginbakae pinaagi sa buy-bust money nga kapin sa P20,000.
Ginasugid nga ro droga hay naghalin sa Luzon.
Kaeabanan sigon nga ginabo-oe nanda ro mga group chat ag ginabayluhan it bag-o sa oras nga may madakpan sa andang grupo agud nga mabudlay nga ma-trace ro mga online drug sellers.
Mabahoe man sigon ro posibilidad nga halin sa shabu hay nagsaylo sa marijuana ro mga drug users sa probinsiya.
Samtang, pabor man ro PDEA Aklan nga makaangkon it mandatory ukon random nga drug test ro mga empleyado it gobyerno agud nga makasiguro nga drug free ro mga taeatapan it gobyerno .
