Mahimo eun isugid ro nagkalat nga online shopping scams makarong season paagi it eReport feature it eGov Super App.
Sa sangka statement, suno kay Department of Information and Communications Technology (DICT) USec. David Almirol nga ro pinakabag-ong feature hay ro e-commerce reporting para sa consumer protection it Department of Trade and Industry (DTI).
Nababaton sigon it DTI Consumer Protection Office ro real-time reports ag insigida nga gina-aksyunan.
Ginapadali man it bag-ong e-Report feature ro proseso it pagsugid it scam numbers sa paagi it pag-capture it screenshot it makadueuda nga text message kaibahan ro numero it sender nga mahimo isumite it user sa gobyerno sa paagi it eGov App.
Angot kara, gin-engganyo it DICT ro publiko nga gamiton ro e-Report ag eTravel features it eGov Super App sa tunga it ginasaligan nga pagtaas it krimen makaron nga Christmas holiday.
