KALIBO, Aklan–Gindagsa it maabu nga deboto ni Sr. Sto. Niño ro ginpatigayun nga opening salvo it lokal nga gobyerno it Kalibo makaron nga gabi-i, Oktobre 8.
Dikara gin-anunsyo ni Kalibo Mayor Juris Bautista-Sucro ro pormal nga pag-umpisa it selebrasyon it Kalibo Sr. Sto. Niño Ati-atihan Festival 2023.
Antes raya hay nagtao anay it anang mensahe ro alkalde sa anang unang 100 diyas nga pagpungko sa pwesto.
Suno kana, kueang ro 100 diyas para ayuson ro banwa.
Kinahang-ean sigon ro siyam nga dag-on para mahimo ro tanan para sa pagbangon ag pag-asenso.
Gin-aku man kara nga limitado eamag ro budget nga anang ginabuytan bangud halin pa raya sa nabilin nga pondo it nagtaliwan nga administrasyon.
Apang, ginatinguhaan sigon nana nga maitao sa mga Kalibonhon ro desinte ag manami nga mga programa.
Angot kara, owa man nakapugong sa excitement it mga pumueoyo ro magauemon nga panyempo para personal nga saksihan ro magarbong okasyon.
Pila sa mga nasaksihan sa opening salvo hay ro fireworks display matapos ro opisyal nga anunsyo it alkalde kadungan it pagbukas sa mga paiwag sa palibot it Kalibo Pastrana Park.
May pilang celebrity guest man nga naimbitahan sa okasyon kamana man nga may pilang banda nga magaperform.
Samtang, hugut man nga ginpatuman sa sueod it festival zone ro pagbawae sa pagdaea it backpack, bote it ilimnon ag mataeum nga bagay.
Umpisa it alas-12:00 kainang it udtro adlaw hay ginsarado eon ro pila sa mga karsada pasueod it festival zone.
Strikto man nga seguridad ro ginpatuman it Kalibo Municipal Police Station kabulig ro iba pang ahensya it gobyerno para masiguro ro kaeuwasan it publiko.
