KALIBO, Aklan – Kabilugan nga naging madinaeag-on ro mga unang daywang adlaw it Opening Salvo it banwa it Kalibo para sa selebrasyon it Kalibo Sr. Sto. Nino Ati-atihan Festival 2025.
Kadungan ku uean hay nagsigabong man ro mga patik, tukar, hilinugyaw ag sadsad it mga bisita, turista, ag tanan nga nagpatisipar para saksaihan ro pormal nga pagbukas it nasambitan nga selebrasyon.
Ginpangunahan ni Mayor Juris Sucro ro nasambit nga proklamasyon kun siin naging baeantayan man ro fireworks display.
Pahayag ni Jay’Ar Arante, Head it Media Team it LGU Kalibo nga ginbida man it mga bisita nga sanday Tom Rodriguez ag Yeng Constantino ro mga ginpreprar nga mga talento ag kanta rason para maeangkag ro mga tumaean-aw.
Kadungan it Opening Slavo binuksan man sa kaparehong adlaw ro Children and Adults’ Park nga ginbunyagan it mga inunga ag adulto, nga todo enjoy sa mga equipment nga ginpahaom ag ginplanuhan it LGU Kalibo.
May kaangtanan kara naghinyo man si Arante nga tinguhaan nga hipigan ukon ingatan ro paggamit it mga raya sa bulig it pagmintinar.
Sa pihak nga parte, naging kontrobersyal man ro presensya it daywang grupo it banda nga nag-angkon it pisikal nga tensyon ku nagtaliwan nga selebrasyon sa uman nga pagpartisipar sa nasambit nga kasadyahan apang raya man hay may pahanugot it alkalde para sa katawhayan ag kalipayan it tanan.
Ginkulayan man it fireworks display ro kaeangitan bangud sa makolor ag nagkaeain-eain kara nga mag estilo rason para mapapundo, mapavideo ag mapabueo it litrato ro mga tawo.
Dugang ni Arante nga baeantayan ro mga dugang nga aktibidades makaron nga adlaw, Oktubre 6 nga ulihing adlaw it three-day celebration.
