KALIBO, Aklan–Naging madinaeag-on ro ginpatigayun nga operasyon it mga doktor sa biktimang si Mary Jane Plaza, 23-anyos it Sitio Lugutan, Brgy. Manocmanoc sa isla Boracay matapos nga makaangkon it lastro sa ueo tuga it pagpang-eambaring it sangka hilong nga eaeaki sa ginasakyan kara nga van ko Lunes it gabi-i sa national highway nga sakop it banwang Nabas.
Suno kay Loren Joy Plaza, igmanghod it biktima nga una eon sa maayos nga kondisyon si Mary Jane kung siin pwede eon raya nga maka-istorya.
Nagbuhay sigon it haeos ap-at nga oras ro operasyon nga nag-umpisa alas-5:00 it hapon ko adlaw it Martes ag natapos bandang alas-9:00 it gabi-i.
Eubos man ro pagpasaeamat kara sa mga tawong may mabinueawanon nga tagipusuon nga nagbulig kanda para matigayun ro operasyon.
Nasayuran nga nakatipon eon ro pamilya Plaza it masobra P230,000 kung siin raya ro andang gingamit bilang punang bayad sa operasyon.
Angot kara, padayun sigon sanda nga nagapanawagan it bulig para mabayaran ro andang bill sa Panay Health Care Hospital.
Si Mary Jane hay nakataeana nga magtapos sa Aklan State University (ASU) Main Campus sa Hulyo 11 bilang Cum Laude sa kursong BSED Major in Mathematics.
