KALIBO, Aklan — Ginbatikos it Bagong Alyansang Makabayan ukon Bayan-Aklan ro Municipal Disaster Risk Reduction and Management Council ukon MDRRMO-Kalibo bangud sa pahayag nga owa pa it baeasihan agud nga magdeklara it state of calamity.
Suno kay Kim Sin Tugna, provincial chairperson it Bayan-Aklan nga dapat eon sanda nga mag-rekomenda it state of calamity bangud sa padayun nga pagtaas it kaso it makamaeatay nga sakit bukon eamang sa banwa it Kalibo kundi sa bilog nga Aklan.
Pinaagi sa deklarasyon suno kana hay makaangkon it access sa calamity funds nga pagagamiton nga pangbakae it bueong it mga pasyente ag iba pang makinarya agud nga mapahagan-hagan ro kaso it sakit .
Umpisa 2016 suno kana hasta makaron nga dag-on hay padayun ro pagsaka it kaso it dengue sa bilog nga probinsiya it Aklan nga kon sa siin ro banwa it Kalibo ro may pinakamataas nga numero nga naga-abot sa 523.
Umpisa Enero 1 hasta Hulyo 6, 2019 hay naga-abot eon sa 2,171 ro kaso nga nakalista it 100 porsyento nga pagtaas kumpara sa kaparehong period ko 2018 .
Obligado sigon ro gobyerno nga ibalik ro nagakabagay nga serbisyo sa publiko pinaagi sa andang ginabayad nga buwis.
Sa pihak nga parte, ginpahayag pa ni Tugna nga nagabuylog ro Bayan-Aklan sa panawagan nga massive clean up drive agud nga matapna ro gina-itlugan it mga namok nga posibleng carrier it dengue.
