KALIBO, Aklan—May bag-o eon nga director ro Aklan Police Provincial Office ukon APPO sa pagkatawu ni P/Col. Arnel Ramos.
Suno kay P/Capt. Aubrey Ayon , tagapaghambae it APPO nga kahapon it Lunes hay pormal eon nga ginbutang si Ramos bilang bag-ong provincial director it Aklan kabaylo ni P/Col. Victorino Romanillos.
Si Romanillos nga miyembro it Philippine National Police Academy ukon PNPA Class of 1995 hay nagpanaog sa pwesto makataliwan ro sang dag-on ag an-um nga buean nga pagpanerbisyo bilang provincial director it Aklan.
Ro turnover of command hay ginpangunahan ni Brigadier General Jack Wanky, regional director it Police Regional Office 6.
Antes nga na-assign sa Aklan, si Ramos hay dating commander it Regional Mobile Force Battalion ukon RMFB 6 ag naeakip sa PNPA Class of 1998.
Ginklaru nga ro pagsaylo it pwesto it daywang opisyal hay kaparte it reassignment nga normal nga nagakatabu sa police organization.
Sa anang mensahe, ginpasiguro sigon ni Ramos nga pagatutukan ro police community relation kamana man nga pagapabaskugon ro anti-criminality campaign sa probinsiya kun sa siin sakop kara ro kampanya kontra sa ilegal nga droga, illegal gambling ag iba pa.
Hinyu nana sa anang mga tawuhan nga iprayoridad ro pagserbisyo sa publiko ag obligasyon sa PNP ag likawan nga maeakot sa anuman nga anomaliya.
Kaeabanan sigon sa naging assignment kara bago nga maging commander it RMFB 6 hay naging chief of police it nagkaeain-eain nga police station sa Luzon nga nag-umpisa sa Tarlac.
