KALIBO, Aklan—Magapatigayon it raffle si Kalibo mayor Juris Sucro hinduna it hapon sa Pastrana Park.
Raya hay kaparte it selebrasyon sa anang kaadlawan makaron nga Abril 15 kon sa siin gusto nana nga ipakigbahin ro anang grasya sa mga kalibonhon ag maging sa mga residente man it ibang banwa.
Mag-eowas kara, ro anang sweldo nga P100,000 pesos makaron nga buean it Abril hay anang gindonar sa municipal treasurer’s office bilang paunang pondo para sa 2024 Kalibo Sto. Niño Ati-Atihan Festival.
Suno kana, naging panaad eon nana nga kada kaadlawan nana hay ginabalik kara sa tawo ro anang mga nabaton nga grasya bilang pagpasaeamat.
Kaeakip sa igaraffle hay ro brand new nga motorsiklo, mga appliances, bugas ag maabong iba pa.
Si mayor Sucro hay kilaea bukon eamang it mga kalibonhon kundi sa mga kaeapit man nga banwa bangud sa anang pagkamabinuligon maskin nga bukon nana raya it mga constituents.
