KALIBO, Aklan — Nagpahayag it pagkabaeaka si Randy Rebaldo, head it Persons with Disability Affairs Office (PDAO)-Aklan may kaangtanan sa mabuhay nga pagka-delay it konstruksyon it bag-ong Kalibo Public Market nga posible sigon nga magresulta sa pag-eabag sa Republic Act No. 9184 ukon ro “Government Procurement Reform Act” nga nagataeana it mga sueundanan sa procurement ukon pagbo-oe it kontratista para sa mga proyekto it gobyerno.
Sa idaeum sigon it nasambit nga laye, pwedeng magapanabat ro contractor kon indi matapos ro proyekto sa gintaeana nga tiempo nga owa it bastante nga legal nga rason.
Nakabaehag man sa implementing rules it laye nga pwedeng papanaugan it liquidated damages, termination it kontrata, ukon blacklisting ro contractor sa mga government projects kun mapamatud-an nga may pagpabaya ukon pag-eabag sa kontrata.
Bangud kara, gin-insister ni Rebaldo nga nagakinahangean it maid-id nga imbestigasyon it natungdan nga taeatapan kon gintaw-an it extension it Municipal Engineering Office ro contractor nga Rotaflex Construction Development Corporation kamana man nga dapat nga magpaathag ro project monitoring team angot sa status it konstruksyon.
Nasayuran nga naga alburuto eon ro mga vendors bangud sa mahinay nga completion it proyekto nga nagabalor it kapin sa P300 milyon.
Nauna eon nga ginpasiguro it contractor sa sangka committee hearing ag site inspection nga matapos ro proyekto bago matapos ro Pebrero 2026.
Ko 2023, gin-umpisahan ro proyekto it bag-ong public market bilang kaparte it modernization program it lokal nga gobyerno it Kalibo.
Ginaeauman nga magiging sentro raya it kalakalan ag negosyo sa banwa sa oras nga eubusan nga matapos.
