Business News ——–Uwa sigon it naduea ukon naiboe-sang pondo sa Interim Reimbursement Mechanism (IRM).
Raya ro gin-insister it Philippine Health Insurance Corp. (PhilHealth) bangud na-liquidate eon sigon it mga health care institutions (HCIs) ro kabilugang P13.03 bilyon ukon 87 porsyento it P14.97 bilyon nga pondo sa idaeom it IRM, halin Dec. 21, 2020.
Suno kay PhilHealth spokesperson Rey Balena, “all properly accounted for” ro P14.97 bilyon nga pondo sa IRM nga ginbaton it 711 nga ospital sa bilog nga nasyon.
Ro IRM hay ro cash advance program it PhilHealth para taw-an ro mga ospital it calamity fund nga magamit it mga pasyente makaron nga tyempo it pandemya.
Sa datos halin sa PhilHealth, sa kabilugang 353 HCIs ro kumpleto nga ro liquidation, samtang 358 pang HCI ro ginahueat nga magsumite it dugang nga liquidation.
Ro PhilHealth NCR-Central Region ro nagbaton it pinakamabahoe nga pondo nga P1.93 billion, ag naka-liquidate eon it P1.41 bilyon.
Ko Agosto 2020, ginbulgar ni dating PhilHealth anti-fraud legal officer Thorrsson Montes Keith sa Senado nga nagpanakaw ro mga opisyal it ahensya it P15 bilyon gamit ro nagkaeain-eain nga pamaagi, kaeakip ro pagpaguwa it IRM fund sa mga ospital nga uwa man it ginabuytang kaso it COVID-19.
Insigidang ginsuspinde it PhilHealth ro IRM agud tun-an ro implementasyon ag solusyanan ro mga naungkat nga isyu sa programa.
