KALIBO, Aklan—Aprubado sa pangatlo ag ulihing pagbasa sa ginpatigayon nga regular session it 18th Sangguniang Panlalawigan it Aklan ro kapin sa P2, 224,400,505 nga annual budget para sa dag-on 2020.
Sa nasambitang pondo, ro P1,385,950,505 hay igataeana sa various expenditures para sa regular fund samtang ro nabilin nga P838,450,000 hay igataeana sa operasyon it lokal economic enterprise it probinsya.
May kaangtanan kara, ginpasaeamatan ni Aklan Governor Florencio Miraflores ro tanan nga miyembro it SP sa ginakabig nga timely nga pagpakasa ag pag-apruba sa 2020 proposed budget.
Suno kana, ro mabahoe nga parte it pondo hay igataeana sa social services nga ginakaeakipan it education, health services, protection for the women and children ag para sa mga under privileged.
Samtang, ro iba hay igabutang sa mga nakaplano eon nga imprasktraktura ag iba pang proyekto para sa probinsya it Aklan.
Ginpasiguro man kara nga magatrabaho bilang sambilog ro executive ag legislative branch para sa ikaumwad dugang it probinsya.
Samtang sa pihak nga parte, ginpaathag ni Vice Governor Atty. Reynaldo Quimpo nga ro pagtaeana sa social services it mabahoe nga pondo ro nagtueod kanda agud nga ipasa gilayon ro nasambitang proposed budget.
Kapin sa 23 porsyento ukon masobra sa P946 milyon it nasambitang pondo ro gintaeana sa social services.
Pamatuod eamang sigon raya nga mabahoe ro pagtatap it gobyerno sa mga pumueoyong aklanon.
Nasayuran nga ko Lunes nga adlaw eagi hay ginpirmahan eon ro nasambitang pondo ni Gov. Miraflores, Vice Gov. Quimpo ag bilog nga miyembro it SP.
Kaibahan nga nagsaksi ro mga provincial head it kada departmento, mga Non-Governmental Organization ukon NGO’s ag iba pa
