KALIBO, Aklan—Ginaduso ni Vice presidential candidate Manny Lopez, nga imaw man ro vice chairman it national advisory board it Labor Party of the Philippines, ro tatlong economic strategies para sa pagbangon it ekonomiya it nasyon.
Sa ginpatigayon nga Comelec-KBP PiliPilipinas forum 2022 , ginpahayag ni Lopez nga sambilog sa anang gina-proponer hay ro pag-angkon it bag-ong Omnibus Investment Code agud nga maging mas maayos ro pagbutang it negosyo ag mapabaskog ro kompetisyon agud nga maka engganyo it mas maabu pa nga foreign direct investments sa Pilipinas.
Ro presente suno kana nga Omnibus Investment Code hay ginsueat pa katong 1987, kun sa siin owa pa it globalization ag bag-ong digital economy.
Mag-eowas kara, plano man nana nga makaangkon it “Bankruptcy law” nga magatau it ikaywang kahigayunan sa mga negosyo nga grabeng naapektuhan it pandemya nga tuga it COVID 19 nga uman nga makabangon.
Pinaagi kara hay pagataw-an it proteksyon ro nagpa-utang ag ro naga-utang.
Gusto man nana nga amyendahan ro peoples initiative nga magatau sigon it gahum sa mga pumueuyu.
Samtang, bilang nagapadaeagan nga kandidato nga owa it opisyal nga ka-tandem nga presidente, ginpromisa ni Lopez nga makikipagbueuligan sa kon sin-o man ro magapungko sa malakanyang engkaso nga magdaog imaw sa eleksyon.
Bukas man imaw nga magserbisyo sa gabinite partikular ro pagdumaea sa Department of Trade and Industry ukon DTI bilang eksperto sa pagnegosyo ag pagdumaea.
Sa pihak kara, nagpamalibad imaw nga pangaeanan kon sin-o sa mga presidentiables ro anang pagasuportahan.
