USA – Naghimo it pagdayaw halin sa sari-saring lider it nasyon sa bilog nga kalibutan ag mangin sa mga mamalidha sa US sa ginpaguwa nga desisyon ni US President Joe Biden nga indi eon ray magdaeaagan pa it uman sa pagkapangeuo.
Haeos tanan it mga presente ag dating mamalidha sa US hay pinasaeamatan si Biden sa anang kaisog umatras sa pag daeagan ag sundon ro ginahinyo it kaabuang kapartido kara.
Sa mga lider it nasyon hay ginpasaeamatan man ni Israeli President Isaac Herzog si Biden bangud sa pag-amiguhan ag ro suporta kara sa mga pamueoyo it Israel.
Sa panig man ni Poland Prime Minister Donald Tusk nga maski mabug-at ro desisyon ni Biden hay nangin tama nga sundon ro kaabuang limog sa ing nana pagdaeagan.
Ginkasubo man it foreign minister it Ireland Michael Martin ro nasambit ng balita ag pinasaeamatan kara ro suporta ni Biden sa andang pamueoyo.
Matandaang nagdisisyon si Biden nga umatras eon eamang matapos ro panawagan it maabong mga kaalyado kara nga nakuebaan sa anang kaeawasan.
Inindorso eon eamang kara nga bumaylo kana si Vice President Kamala Harris nga magdaeagan sa pagkapangueo.
Maabong mga democrats man ro nagpaabot it suporta kay Harris kung siin sa mga masunod nga adlaw hay andang igaubra ro pormal nga nominasyon.
Ginhibaygan eon eamang ni dating US President Donald Trump ro desisyon ni Biden kung siin dapat eon gidmang nga maghalin ro ginbansagan nana nga pinakamaeaing Pangueo sa kasaysayan it Amerika.
Ginhikayan man ni Trump si Harris kung siin mas madali sigon raying perdihon kumpara kay Biden.
