KALIBO, Aklan — Pagataw-an it atensyon it lokal nga gobyerno it Malay ro pag-develop sa electric tricycle ukon e-trike program sa Isla it Boracay.
Suno sa Sangguniang Bayan it Malay, ginatutukan nanda ro mga programa it gobyerno agud mabuligan ro mga e-trike operator, driver ag supplier nga eubus nga naapektuhan sa mga ginpatuman nga lockdown bangud sa coronavirus pandemic.
Mag-eowas kara, gusto man nga tutukan it LGU Malay ro boundary payments system, battery leasing services, financing scheme, ag charging it mga batteries it mga e-trike suppliers.
Ro mga supplier it e-trike hay ginamanduan sa bag-ong ordinansa nga magtukod it indi magnaba sa daywang charging station sa isla.
Sa makaron, kapin sa 250 nga e-trikes ukon 56 porsiyento ro naga-operate sa isla sa idaeum it ‘new normal’ status.
Nasayuran nga ro e-trike program hay ginlunsar ko 2012 agud i-upgrade ro pampublikong saeakyan sa Isla ag makabulig nga mapanaba ro polusyon sa hangin nga naghalin sa mga de-gasolinang tricycle.
