KALIBO, Aklan—Manami nga practice ro regular nga pag-donate it dugo kada tatlong buean.
Suno kay Ace Phil Feliciano , spokesperson Philippine Red Cross Aklan chapter, kapareho sa saeakyan hay matsa nagapa-change oil eamang kon naga-donate it dugo.
Dugang pa kara nga indi magkabaeaka nga makueangan it dugo bangud nga dere-deretso ro produksyon it dugo sa bone marrow it eawas kun sa siin ginabayluhan raya it mas bag-o ag mas aktibo nga mga blood cells.
Mas maganami pa sigon ro functions it nagkaeain-eain nga organs sa eawas.
Samtang, ginduea man ni Feliciano ro pagbakaeaka bangud nga antes nga makapag-donate it dugo hay gina-usisa anay ro hemoglobin level it dugo agud nga masayuran kon anemic ukon bukon.
Kaeabanan sigon sa mga rason kon ham-an nga manaba ro hemoglobin level hay bangud nga posibleng nagpueaw ukon kueang sa pahuway ukon iron intake halin sa pagkaon.
Sa kamatuoran suno kana hay maabu nga mga adults nga eligible nga mag donate apang ro masubo haeos sang porsyento eamang ro haum nga magtau it andang dugo.
Bangud kara, gina engganyo ni Feliciano ro tanan nga mga pumueuyu nga testingan nga mag-donate it dugo sa maabot nga dugong bombo 2024 nga may tema nga ‘a little pain, a life to gain’ sa maabot nga nobyembre 16 sa Gaisano grand mall nga maga-umpisa alas-8:30 it agahon.
Dapat suno kana nga maging kaparte it aton nga kabuhi ukon “way of life” ro regular nga pag donate it dugo.
Indi kinahangean nga makaangkon it outbreak it dengue ukon iba pang sakit antes nga maisipan nga mag-donate it dugo.
Maabu nga kabuhi ro masalbar suno kana kun naga-donate eamang it dugo.
Manami man sigon sa pamatyagan nga maging selfless bangud nga ro kada isaea katon hay may responsibilidad sa isigkatawo.
Abiso pa it PRC nga bago mag-donate it dugo hay likawan ro pag-inom it aeak, likawan ro mga mamantikang pagkaon, mag-inom it maabung tubi, magkaon it tama, ag dapat hay may maayos ukon bastante nga tueog.
