KALIBO, Aklan — Ginrekomenda it Boracay Inter-Agency Task Force (BIARF) nga i-eakip sa mga regulated water sports ro dragon boat activities sa isla it Boracay.
Suno kay Boracay Inter-Agency Rehabilitation, Management Group (BIARMG) general manager Natividad Berdandino nga raya ro sambilog sa mga nabilog nga rekomendasyon it task force sa ginpatigayon nga pueong kaibahan ro nagkaeain-eain nga ahensiya it gobyerno.
Tuyo kara nga mabantayan ro kada hueag ag aktibidad sa eawod agud nga indi eon mauman pa ro trahedya nga ginkamatay it pitong paddlers it Boracay Dragon Force team.
Natukiban sa pueong nga owa nagsunod sa safety protocols partikular sa pagsuksok it special life vest ro nasambit nga grupo samtang nga nagapatigayon it routine training.
Samtang, ginhinyu it Boracay All Stars Dragon Boat team nga boe-on eon ro suspension sa tanan nga dragon boat activities sa isla nga ginmandu ni Environment Secretary Roy Cimatu bangud nga maga-praktis sigon ro mga raya para sa paga-intrahan nga international competition sa nasyong Taiwan.
