KALIBO, Aklan–Gina-abangan eon it maabu nga mga football fans ro nagahilapit nga pag-umpisa it FIFA World Cup 2022 sa bahin it Qatar.
Suno kay Kyle Justin Marcelino, football coach sa probinsya it Aklan nga exciting ro magiging hampang makaron nga dag-on bangud maabu nga mga mayad nga player nga magahampang.
Apang, base sa personal nga panan-awan ni Coach Marcelino, ro Argentina ro ginakabig kara nga top team bangud pila sa andang player hay naeakip sa top of the game sa football world.
Samtang, base sigon sa nakita kara nga line up sa Asian clubs, ro koponan it Japan ag Australia eamang ro may 50 porsyento nga tyansa nga makasueod sa quarter finals.
Raya hay bangud nga ro andang players hay may club sa mabahoe nga professional league kapareho it Amerika ag Europe.
Matueopangdan nga 32 tanan nga mga koponan halin sa nagkaeain-eain nga nasyon ro magapasakop sa World Cup nga maga-umpisa sa Nobyembre 20.
