NATIONAL News —- Ginakonsidera it gobyerno it Pilipinas nga magbakae it Chinook helicopters halin sa Estados Unidos matapos iatras ro kontrata sa pagbakae kunta it 16 nga Russian helicopters.
Ginpahayag ni Philippine Ambassador to the United States Jose Manuel Romualdez nga ro kanselasyon it kontrata hay “precipitated mainly by the war in Ukraine.”
Ro Chinooks ro igabueos sa ‘heavy lift helicopters’ nga kinahangean it armed forces it nasyon para sa ‘movement of troops ag disaster preparedness.’
Madumduman nga ginpirmahan ro military procurement contract ko November 2021 sa idaeum it administrasyong Duterte.
Raya hay agud nga magbakae it 16 Mi-17 Russian military transport helicopters nga may dugang nga unit it Soviet era heavy-lift aircrafts nga iga-eakip nga owa it bayad.
Nauna kara, nagbilog ro Department of National Defense it sangka komite agud nga obrahon nga pormal ro withdrawal ukon pag-atras halin sa kontrata nga nagabalor it P12.7 bilyong piso ukon US$ 244.2 million.
Ginatan-aw man sigon it gobyerno ro pagbo-oe it suplay it ibang bagay nga posibleng kinahangean it nasyon halin sa Russia kabaylo it helicopters.
