KALIBO, Aklan — Owa masyadong ginaeauman it mga fruit vendors nga magadagsa ro mga bumaeakae sa mga fruit stands sa Roxas Avenue, Kalibo samtang nagahilapit ro selebrasyon it Bag-ong Dag-on.
Suno kay Emilda dela Cruz, sangka fruit vendor nga makaron hay nagkalhit eon sa nagkaeain-eain nga lugar ro mga nagabaligya it prutas.
Dugang pa nga mag-eowas suno kana nga medyu nagatipid ro kaabuan sa mga pumueuyu hay apektado man sanda nga mga retailer it mga online selling ukon delivery services rason nga mas pang nabawasan ro andang kita.
Sa makaron sigon maskin nga tatlong adlaw eon lang antes ro pagsug-aeaw sa Bag-ong Dag-on hay mahina pa ro andang kita.
Samtang, gindugang pa ni dela Cruz nga makaron nga adlaw it Sabado hay ginaeauman nga amat-amat eon nga magataas ro presyo it mga baligya nanda nga prutas.
Raya hay bangud nga magasaka eon it P100 hasta P200 ro kada box it mga prutas halin sa andang supplier.
Owa suno kana it problema sa supply it mga imported nga prutas bangud nga may naka-stock eon kumpara sa mga prutas nga nagahalin sa nasyon partikular ro pinya nga nagaka-ubusan eon.
Kaeakip suno kana sa madahog nga prutas kada New Year celebration hay imported kapareho it mansanas, kiat-kiat, orange, grapes, pomelo halin sa China ag iba pa.
