KALIBO, Aklan — Padayun nga ginapabaskog it National Food Authority (NFA) ro andang pagpamakae it paeay sa probinsiya it Aklan .
Raya hay sa pihak it manaba nga produksyon tuga it naexperiensiyahan nga kawad-an it tubi sa irigasyon ag tag-init .
Sa interview it Bombo Radyo, ginpahayag ni NFA Aklan provincial manager Josephine Castillo nga naka-stock makaron sa andang bodega ro nabakae nga kapin sa 2,000 nga sako it paeay halin sa mga lokal nga mangunguma umpisa ko buean it Marso hasta sa makaron .
Umpisa ko buean it Oktubre, nagtaas suno kana sa P20.40 kada kilo ro bakae it NFA it paeay mag-eowas pa ro mga insentibo .
Nagabakae man sigon sanda it eabtong ukon bukon pa it uga, apang medyu manaba ro presyo sa P17.
Samtang, gindugang pa ni Castillo nga nabatyagan eon ro pagnaba it presyo it bugas bangud sa implementasyon it Rice Tarrification Law nga kon sa siin ginapasugtan nga mag-import it bugas ro mga negosyante .
Bangud sa nasambit nga kasuguan, limitado eon suno kana ro function it NFA ag nakatutuk eon lang sanda sa buffer stocking.
Hasta eon lang sigon sa buean it Setyembre pwedeng mabakae ro NFA rice .
Sa makaron hay may naka-stock sanda sa andang bodega nga 5,000 bags nga imported rice ag may paeaabuton pa nga 7,000 bags sa sueod it makaron nga domingo halin sa regional office.
