KALIBO, Aklan—Napurnada ro pagbalik it operasyon it lotto makaron nga adlaw matapos nga ginpaidaeum it uman ni Pangueong Rodrigo Duterte sa modified enhanced community quarantine (MECQ) ro Metro Manila ag 4 ka mga probinsya.
Suno kay John Martin Alipao, Financial Management Officer it PCSO Aklan nga base sa ginpagguwa nga pahayag it Philippine Charity Sweepstakes Office (PCSO), ginpaiway anay ro pagbalik it limitadong operasyon it lotto, operasyon it instant sweepstakes ag online Keno halin makaron nga adlaw, Agosto 4 hasta sa Agosto 18.
Una kara, nagpangayo it daywang dominggo nga ‘time-out’ ro mga healthcare worker bangud sa nagalobo nga kaso it coronavirus disease 2019 (COVID-19) sa nasyon.
Madumduman nga gin-anunsiyo ni PCSO General Manager Royina Garma ro pagbalik-operasyon kunta it ahensya umpisa Agosto 4 apang limitado eamang ro magigng operasyon, kaeakip kara ro Lotto 6/42 ag Mega Lotto 6/45 games, sa mga lugar nga una sa idaeum it general community quarantine (GCQ) ag modified general community quarantine (MGCQ).
Nagbalik eun man ro operasyon it instant sweepstakes ko Hulyo 20 ag maging it online Keno nga nag-umpisa ko Hulyo 28.
