KALIBO, Aklan—Nakitaan eon makaron it pagbalik it kabaskkog it turismo ro Isla it Boracay sa pihak it nagapabilin nga paeag it COVID-19 pandemic.
Suno kay Malay Tourism Officer Felix Delos Santos nga naga-average sa 2,000 hasta 4,000 ro mga nagasueod nga turista kada adlaw.
Bangud kara, maskin paalin suno kana nga nalipay ro mga tourism frontliners ag mga negosyante bangud sa pagbuhos it mga bisita nga kon amat hay nagatuga eon it pag-gutok it trapiko.
Sa kamatuoran suno kana, ko Pebrero 24 hay nakalista sanda it pinakamataas nga numero it mga bakasyunista nga nag-abot sa 4,566.
Ginaeauman sigon nga maga-dere-deretso ro mataas nga tourist arrivals bangud nga nagahilapit eon ro summer.
Sa pihak nga parte, base sa datos , naga-abot eon sa 258 ro mga foreign tourists nga nagsueod sa Boracay umpisa ko Pebrero 12 kat ginbuksan it gobyerno ro borders it Pilipinas para sa international travelers halin sa visa-free countries.
Kaabuan sa mga raya hay naghalin sa Estados Unidos , United Kingdom , Germany ag maabu nga iba pa.
Samtang, mabahoe suno kana ro naging epekto it paghaeuga it mga ginapatuman nga restrictions sa pagbuhos it mga domestic tourists nga kaabuan hay naghalin sa national capital region.
Owa eon man suno kana it nailistang reklamo halin sa mga turista sa pagbo-oe it QR code.
Balik operasyon eon man ro seasports ag aqua sports activities, apang limitado sa 50 to 70% ro ginapasugtan.
Nagapabilin man nga sarado ro mga disco bars agud nga mapatuman ro physical distancing.
Ginpahayag pa ni Delos Santos nga ginatantiya nga sa sueod it limang dag-on hay makabangon it eubusan ro boracay halin sa pagkalugi.
Nasayuran nga sa pre-pandemic level, naga-income ro boracay sa sueod it sang dag-on it kapin sa 62 bilyon pesos sa tourism receipts.
