NATIONAL News — Hugut nga ginkontra ni Senador Joel Villanueva ro proposisyon nga buhi-on ro online cockfighting ukon e-sabong nga sangka pamaagi agud nga pun-an ro nadueang kita sa pagbawae sa Philippine Offshore Gaming Operators (POGOs).
Nauna eon nga nagdihon si Villanueva it Senate Bill No. 1281 nga nagatuyo nga ibawae ro tanan nga klase it online gambling sa nasyon.
Suno pa sa senador, maskin ko kasagsagan it andang operasyon, napamatud-an nga bukon it praktikal nga solusyon ro POGO para sa pagtipon it kita bangud ro nakolektang buwis halin kara hay masyadong manaba.
Kapareho man it natabu antes nga ginpapundo ro e-sabong ko Mayo 2022, kun sa siin ginpadumdum it Bureau of Internal Revenue (BIR) ro mga operator nga magbayad it andang tax obligations matapos madiskubre sa pagpamati it Senado nga nagakita sanda it bilyong piso sa online “talpak.”
Suno kay Villanueva, napas-eawan man ro BIR ag ro Philippine Amusement and Gaming Corporation (PAGCOR) nga kolektahon ro 20-porsiyentong buwis halin sa mga kadaeag-an it mga online sabong operator umpisa nga umarangkada ro e-sabong ko 2020.
Sa separado nga pagpamati it Senado ko Pebrero 2024, gin-aku it PAGCOR nga nagapadayun gihapon ro e-sabong sa pihak it pagbawal kara.
Nadiskubre man sa pagpamati nga may 789 aktibong e-sabong operations sa nasyon.
Nagpanawagan man si Villanueva sa mga law enforcement agency, kaibahan ro Presidential Anti-Organized Crime Commission (PAOCC), nga magpatuman it hugut nga mga tikang kontra sa e-sabong, kapareho it gina-obra sa mga POGO, agud nga mapugngan ro uman nga pag-usbong kara.
Kadungan kara, ginmitlang ni Villanueva ro kahimtangan it mga sabungero halin sa Bulacan nga owa gihapon natumod ro ginakahimtangan hasta sa makaron.
