KALIBO, Aklan — Ginpasugtan eon it Commission on Elections ukon Comelec ro pagbukas it mga yellow ballot boxes nga gingamit ko 2018 Barangay ag Sangguniang Kabataan ukon SK elections.
Raya hay bilang preparasyon para sa paeaabuton nga Barangay ag Sangguniang Kabataan elections sa Mayo 11, 2020.
Kapin sa 162 nga mga ballot boxes ro ginbuksan sa Local Civil Registry Office nga ginpangunahan ni Municipal Election Officer Atty. Rommel Benliro it Comelec-Kalibo ag ginsaksihan it mga katapo it media ag iba pang stakeholders.
Suno kana nga ro tikang hay sandig sa Comelec Resolution no. 10515, nga kon sa siin may sueod raya nga mga election returns ag iba pang dokumento nga gingamit ko nagtaliwan nga eleksyon.
Ro sueod sigon kara hay pagataguon ukon iga-preserve para sa future references ukon hasta sa 10 dag-on.
Ginklaru it Comelec nga ro mga ballot box nga ginbuksan hay indi pwedeng gamiton sa anumang election protest ukon official investigation.
Nakabaehag sigon sa resolution ro mga procedures ag conditions sa pagbukas it ballot boxes nga kon sa siin ro pagbukas kara hay dapat nga dumaeahan it Municipal Treasurer ukon Election officer.
Dapat nga ipakita sa pubiko ro pagpatigayon kara ag sandig sa gintaeana nga lugar, petsa ag oras.
Dapat nga ginapatigayon raya sa sueod it office hours.
Maid-id man nga ginabusisi ro mga ballot boxes agud nga masayuran kon pwede pa raya nga magamit sa masunod nga barangay eleksyon.
Ro mga samad ag depektibong ballot boxes hay pagagamiton eon lang nga storage ballot box.
