KALIBO, AKLAN — Ginpapundo eon it Department of Environment and Natural Resources (DENR) ro pag-develop sa kabukiran it Brgy. Yapak sa isla it Boracay kasunod it reklamo it sangka grupo it wildlife enthusiast.
Ginpahayag ni Provincial Environment and Natural Resources Officer (PENRO)-Aklan Ivene Reyes nga ginserbe it ahensya ro cease and desist order (CDO) nga nagasuspinde sa development it nasambitang lugar.
Suno kana nga ginpaguwa ro mandato kaangot sa kawad-an it permit it kontraktor sa pagbuldos it pilang parte it bukid ag pagputoe it mga kakahuyan.
Mag-eowas kara, uwa man sigon raya it Environmental Compliance Certificate (ECC).
Bangud kara, ginapabayad it DENR it multang P160,000 ro kontraktor sa iligal nga pagputoe it kapin sa 70 mga punong-kahoy, ginapatamnan it 1,700 nga kahoy ag ginapa-donate ro mga ginputoe nga kahoy.
May multa pa sandang P50,000 sa kawad-an it ECC.
Magiging epektibo sigon ro CDO samtang uwa pa nabayaran it kontraktor ro andang multa.
Ro waeong ektaryang lugar hay nabakae it sangka pribadong kompaniya nga pagapatindugan sigon it sangka hotel.
Nasayuran nga ro nasambitang bukid hay gindeklarang forest land it DENR ag ginaistaran it mga paniki.
