HEALTH News — Makabig nga peligroso ro pagpabutang it bulitas sa kinatawo it eaeaki.
Sa artikulong Serbian Journal of Dermatology and Venereology, ginpaathag kara nga ro bulitas ukon artificial penile nodules hay ro pagtanum it medyu maisot nga beads ukon bolang pwedeng himo sa plastic, metal, kahoy, ukon espesyal nga klase it bato ag glass sa idaeum it penile skin agud nga patambukon ro kinatawo.
Apang owa it sin-o man nga doktor ro nagakabit kara.
Suno sa mga eksperto nga kaeabanan sigon sa mga nagapabutang kara hay ro mga kaeaeakin-an nga masyadong insecure sa size it andang kinatawo.
May iba nga napilitan eamang bangud sa soesoe it mga barkada agud nga ipakita ro pakikisama nga ginatawag sa mga amigo nga naga-angkon man it bulitas sa andang kinatawo.
Base sa pagtuon, owa naila ro pilang mga misis sa nasambit nga ideya ag indi nanda masayuran kon ham-an nga nagapakabit kara ro andang mga mister.
Bangud kara, nagaduda sigon ro pilang misis kon para gid man kanda ro ginapakabit nga bolitas sa pagpati nga mataw-an sanda it kalipay sa pakikipaghieawas.
Pila kanda hay gina-angot ro pagpakabit it bulitas sa infidelity ukon pag-angkon it kabit it andang mga asawa.
Ginpaathag it mga eksperto nga posibleng makaangkon it impeksiyon ukon makamaeatay nga tetanus sa kinatawo ro eaeaking nagapabutang it bulitas ag puwedeng makasakit man sa andang partner kon nagahieawas.
Ginalaygay it mga eksperto nga mas mayad nga ipabo-oe ro bulitas bangud nga posible raya nga magtuga it pagkabaog ukon cancer sa mga eaeaki.
