Kasunod it pagsueod it Ber months ag pagbalik sa normal it klase it ibang eskwelahan, naging maayos eon ro pagbyahe it mga tricycle driver sa banwa it Kalibo.
Raya hay matapos nga nadugangan man ro andang kita nga ginauli sa andang pamilya.
Suno kay Antonio Nama, presidente it KAPETODA sa eastern terminal nga medyo nagtaas eon ro andang kita dugangan pa it magkasunod nga dominggo sa pagnaba sa presyo it langis.
May kaangtanan kara, nagnaba man suno kana ro panueoktan sa pamasahe kon siin ro regular passenger hay kapin sa P12 pesos ag ro estudyante, senior citizen ag pwd’s hay P10 pesos.
Apang, may mga commuters sigon nga naanad eon sa pagbayad it P15 pesos bangud nga nabatyagan man nanda ro kalisod it mga drivers.
Samtang sa pihak nga parte, nag-apela ro asosasyon ni Nama sa mga kolurom tricycle nga magsueod sa gintaeana nga oras para kanda agud nga makabyahe ro mga raya.
Ginpahayag nga alas-5:00 it hapon pa dapat ro mga raya mag-umpisa it pagbyahe apang ro iba kanda hay nagaguwa it alas-12:00 it truadlaw rason nga naagawan it mga pasahero ro mga lihitimo nga nagabyahe sa banwa it Kalibo.
