KALIBO,Aklan– Kasunod sa paandam it Food and Drug Administration (FDA) angot sa pagbakae ag paggamit it pilang hampangan nga pang-onga partikular ro “lato-lato” bangud nga uwa raya nag-agi sa andang pag-usisa, igabawae sa Kalibo Pilot Elementary School (KPES) ro pagdaea it nasambit nga hampangan.
Suno kay KPES Principal II Allan Relloto, uwa sanda naila nga makaistorbo sa klase it ibang estudyante bangud nga ro paghampang kara hay nagakriar it mabaskog tunog.
Mag-eowas kara, posible pang makahalit kanda ag base umpisahan pa it sugae.
Aminado ro principal nga may manami nga benepisyo para sa mga inonga ro paghampang apang bukon it kaparehas kara nga hampangan rason nga ginahinyo nana sa mga ginikanan nga inde eon magdaea it makarundayang klase it hampangan.
Kon sa anda sigon nga panimaeay hay pwede ta sanda maghampang apang sa eskwelahan hay anda raya nga pagadumilian.
Nasayuran nga sa abiso it FDA, gintumod kara ro unlabeled green lato-lato, pro-clackers lato-lato nga may iwag ag lato-lato nga ginabaligya sa sangka online shopping platform nga uwa it certificate of product notification rason nga bukon it sigurado ro kalidad ag kaeowasan it nasambit nga hampangan eabi eon sa mga onga.
