KALIBO, Aklan–Ginapanindugan ni Malay Sangguniang Bayan member Alan Palma, Sr., nga nagakabagay nga ro operasyon ag pagdumaea sa Isla it Boracay hay magapabilin sa poder it mga Aklanon kaysa nga permanenteng i-take-over it national government.
Raya hay kasunod it uman nga pagbuhi sa hagna nga nagatukod it government-owned and -controlled corporation ukon GOCC nga magadumaea sa sikat nga tourist spot.
Ro House Bill 1085 ukon Boracay Island Development Authority ukon BIDA GOCC bill hay ginpaidaeum eon sa unang pagbasa sa manaba nga kapueungan it kongreso sa pihak it hugut nga oposisyon it mga lokal nga opisyal, nagkaeain-eain nga grupo ag iba pa.
Suno kay Palma nga maduea-an kara it kinamatarung ro mga Aklanon bangud nga engkaso nga madayun hay ro koleksyon sa real estate tax eamang ro maagto sa Malay.
Kon nakaangkon man sigon it kapabayaan ko 2018 rason nga ginparasado ro isla para sa rehabilitasyon, apang kon isipon hay bukon eamang it saea it mga LGUs it Aklan ag Malay ro natabu kundi nga nakaangkon man it kakueangan partikular sa monitoring ro mga natungdan nga ahensiya it gobyerno kapareho it DILG, DOT, DENR, DTI ag DPWH.
Maskin suno kana nga nagmadinaeag-on ro rehabilitasyon sa isla sa pagpanguna it dating Boracay Inter-Agency Task Force, apang owa it kinamatarung ro gobyerno nasyunal nga angkunon ro Boracay.
Ginsuhestiyon ni Palma nga pwede man nga magtukod it sangka building ro nasambit nga mga ahensiya it gobyerno agud nga matutukan ro kahimtangan it Boracay sa baylo nga boe-an it pangabuhian ag income.
Ginpasiguro man kara ro andang 100% nga suporta.
Sa idaeum it BIDA-GOCC bill, sanda ro may kinamatarung nga magtau it kontrata, magpa-renta, magbakae, magbaligya, mag angkon, magpanag-iya ukon mag-dispose it real property sa nasambit nga lugar.
