KALIBO, Aklan—Sambilog sa mga nagapangunang leksyon it EDSA People Power Revolution hay ro paghugpong ag pagkaeasugot it kada pumueuyu para sa kamaeayran it nasyon.
Suno kay Atty Plaridel Morania, sangka batikang abogado sa Aklan nga pinaagi kara hay nawakasan ro Martial Law sa nasyon ag napatalsik sa posisyon ro diktador nga si dating Pangueong Ferdinand Marcos Sr.
Kabay suno kana nga padayun nga ibutang sa isip ag tagipusuon it mga Filipino nga magiging posible ro tanan kon nagahugpong ag nagakaeasugot ro tanan para sa sangka katuyuan.
Dugang pa ni Atty. Morania nga sa makaron hay amat-amat eon nga nababatyagan ro epekto it People Power Revolution.
Apang bangud nga mas nagapangibabaw ro mga pigado hay dapat nga magpaiway ro mga may ikasarang sa kabuhi sa mga programa ag pribilihiyo nga ginatau it gobyerno.
Ginsuhestiyon pa nana sa mga Filipino nga ipatuman ro self-reliant ag maghugod agud nga indi eon masyadong magsalig sa ginatau nga ayuda it gobyerno.
Samtang, kahigayunan man sigon ro okasyon agud nga makaangkon it ‘renewed commitment’ ro kada isaea sa pagsueong it kalinong ag demokrasya it nasyon.
Hinyu man nana sa mga nagaprotesta nga may reklamo sa gobyerno nga makaangkon it limitasyon agud nga malikawan ro anuman nga kinagamo .
