Ginpasa it Barangay Landan sa Polomolok, South Cotabato ro Anti-Gossip Ordinance ukon ro pagbawae sa pagiging chismosa agud nga mabawasan ro mga banggi-anay ag owa pagka-ilintindihan it magkaeapitbaeay.
Matapos sigon nga nag-abu ro mga away nga nag-umpisa sa pagpakalhit it saea nga impormasyon, mapanamad nga tsismis ag mga istoryang owa it bastante nga basehan.
Suno kay Barangay Kagawad Joey Salazar Minggito, author it Barangay Ordinance No. 8, Series of 2026, maabung reklamo sa barangay ro naga-ugat sa saea nga mga istorya angot sa ibang residente.
Ginpahayag ni Minggito nga nagaka-ubos ro oras it mga opisyal sa pag-ayos it mga away nga pwede kunta nga malikawan kun naging madahan eamang ro mga residente sa pagpakalhit it impormasyon.
Suportado man it pilang residente ro ordinansa bangud nga pwede sigon nga masamad ro tsismis it pag-amiguhan, relasyon sa pamilya ag magkaeapitbaeay.
Ginklaru man ni Minggito nga owa kara ginabawae ro hilway nga pagpahayag.
Target eamang sigon it ordinansa hay ro mapanamad nga tsismis nga mapamatud-an pinaagi sa bastante nga ebidensiya matapos ro imbestigasyon.
Gin-aprubahan it Sangguniang Bayan it Polomolok ro ordinansa ko Hulyo 10, 2026.
Sa idaeum it ordinansa, pagamultahan it P1,000 ro pag-eabag ag P1,500 man sa ikaywang pageabag.
Pwede man nga manduan ro mapamatud-an nga nag-eabag nga magpangayo it public apology sa social media, mag-eowas sa multa.
Nagaeaum ro mga opisyal it Barangay Landan nga makabulig ro ordinansa para mabawasan ro away, mapabilin ro manami nga relasyon it magkaeapitbaeay ag ma-engganyo ro mga residente nga ayuson ro andang mga problema sa maayos nga pamaagi.
