KALIBO, Aklan—Ginsuhestiyon ni Sangguniang Panlalawigan member Atty. Immanuel “Nolly” Sodusta sa andang ginpatigayun nga session nga makaangkon it legislative inquiry para mausisa ro natabo nga aberya ko Nobyembre 16 kung siin na-stranded ro pilang turista sa Ninoy Aquino International Airport (NAIA).
Suno kay Atty. Sodusta, tyempo eon para masayuran ro mga rason sa masyadong mabudlay nga proseso it mga turista ag biyahero nga naga-adto sa Aklan.
Dapat sigon nga masolusyonan raya sa mas madali nga tyempo para indi eon maperwisyo ag makaangkon it delay sa biyahe it mga turista.
Madumduman nga pilang mga turista ro nag-alburuto matapos nga owa naka-eagas sa tagsa-tagsa ka mga flight bangud sa kapas-eawan nga makabuoe it required nga QR codes sa tamang oras.
Sa makaron, naga-abot sa 1,000 hasta 1,500 ro aplikasyon nga gina-proseso it gobyerno probinsyal kada adlaw para sa QR code.
