NEWS Analysis–Maabu ro naga-oponer sa Maharlika Investment Fund.
Numero unong rason it pagpamaeabag kara it kaabuan hay posibleng pag-ugatan it korapsiyon.
Posibleng makurakot ro pondo ag mauli eamang raya sa owa.
Ginhalimbawa ro natabu sa 1Malaysia Development Berhad nga bumagsak bangud nga ginkurakot it mga opisyales ro pondo.
Ro mayad sa Malaysia, may mga nakulong nga opisyales nga nagpanakaw it pondo.
Kun iya matabu sa Pilipinas ro natabu sa Malaysia, sigurado nga owa it makulong.
Maabung opisyales nga eakot sa korapsiyon ro owa napinahan sa pihak nga maabu ro ginkulimbat.
Maabu ro naabswelto ag nabalewala ro tanan.
Ro naaywan nga makaeoeo-oy hay ro mga nakanganga nga pumueuyu nga nagakutoy ro tiyan.
Ro paninggitan it mga naga oponer sa Maharlika Investment Fund hay owa natabu.
Nagsueod sa waea nga dueunggan ag nagguwa sa tuo.
Owa it kabudlay nga nakaeusot sa Kongreso ag gin sertipikahan pang “urgent” ni President Ferdinand Marcos Jr.
Naging laye ro Maharlika Investment Fund Act of 2023 ukon Republic Act 11953.
Ginpirmahan raya ni Marcos ko Martes.
Tuyo sa pagtukod it Maharlika nga suportahan ro mga handum it gobyerno agud nga mas pang mapa-umwad ro ekonomiya
Pinaagi kara, maga-umwad ro pangabuhian it nasyon ag magapanipueos ro mga pumueuyu.
Sa idaeum it laye, pagataw-an it kapasidad ro gobyerno nga mag-invest sa mga importanteng proyekto kapareho it agrikultura, imprastruktura, ag maabu nga iba pa.
Magahalin ro pondo it Maharlika sa Land Bank of the Philippines, Development Bank of the Philippines, Bangko Sentral ng Pilipinas ag Philippine Amusement and Gaming Corp.
Owa eon gin eakip ro SSS ag GSIS sa pagaboe-an it pondo , apang puwede gihapon nga mag-invest it kwarta ro daywang pension funds kun paga gustuhon it mga raya.
Owa eon it mahimo ro mga nagakontra sa Maharlika bangud nga raya hay laye eon.
Ro mahimo eon lang it kaabuan hay maging mapagbantay sa operasyon it Maharlika.
Subaybayan ro hueag kara.
Maskin pa nga ginhambae it Presidente nga owa it matabu nga pagpanakaw sa pondo, mas mayad sa gihapon ro magbantay sa investment fund.
Dapat nga maging muk-eat ro tanan.
